Starziku, wiycie co to jest „Hallowe’en” ?
Słyszoł żech już pora lot tymu te słowo, ale se teraz niy poradza wspomnieć przi jakij sposobności.
To w Ameryce tako moda wymyślili. Straszom sie wydłubanymi baniami ze świyczkom i rostolicznymi śmiertkami, dziyń
przed Wszystkimi Świyntymi.
Patrz, za dziecka żech niy wiedzioł, że to sie „Hallowe’en” nazywo, a tyż my baniami, ze świyczkom
w pojstrzodku, straszyli.
Jak prziszła jesiyn na podlesie, to jo i pora mojich kamratow, poszli my na pole od Rojczyny, kaj dycko miyndzy ćwiklom,
wielkie banie rosły. Wybrali my se jedna i zaniyśli na kroj do lasa. Tam mi zaroz dali noż do rynki, bo mi wierzili wszyjscy, że tyj
banie niy popsuja. Zaroz tyż broł żech sie do roboty. Wyr-znył żech z jednyj strony taki łokrogły dekiel i przez ta dziura wszystko z
pojstrzodka wysnorził.
Pestki to my do kapsów pochowali, a reszta charbozi wytrzasło sie do krzokow. Jak już bania była w pojstrzodku prozno,
to żech powyrzinoł ślypska, kichol i pysk. Potym sie do banie, zapolono świyczka dało, deklikiym zatkało i szli my straszyć pod łokna
młodsze siostry, czy braci, jak sie cima zrobiyło. Dycko my śmiychu przi tym mieli co niy miara. Wszystko by było fajnie, keby my yno na
tym przistali. Za łebonia, to jo mioł fantazjo tako, że do dzisioj mi to łostoło. Wynochwiył żech, żeby ta bania wstyrczyć na żerdka
i iść postraszyć tako starka, keryj wszyjscy na podlesiu "Cyncla" godali. Miyszkała łona w takij małyj izdebce w giblu, ze
swojim chopym Aleksym. Byli juz fest starzi i mało sie kaj z tego wiyrchu ruszali.
Jedyn wieczor my z tom przirychtowanom baniom poszli pod te łokiynko od "Cyncle".
Mie trefiyło trzimać ta żerdka z baniom, bo wszyjscy prawiyli :
" przeca to jest twoj pomyślunek, to teraz musisz pokozać, że sie niy bojisz..."
Wol niy wol, musioł żech ta bania trzimac. Dwie dziołchy od somsiadow stoły przi mie biołymi płachtami odziote, a
reszta łeboni z dalsza sie prziglondało. Boli sie wszyjscy "Cyncle", bo bezmała umiała poszczół puszczać, toż yno
kibicowali, co z tego wyniknie.
Dzwignył żech ta bania na rowno z tym jejich łokiynkiym, a te dwie dziołchy kole mie (siostry to byly, ale gorsze od
synkow, niczego sie niy boły), zaczły hukac jak sowy.
Za jako chwilka słyszymy, że sie łokiynko otwiyro. Już mie strach oblatuje, że na mie jeszcze poszczoł pusci, ale
twardo stoja i czekom. Łokno sie otwarło i słysza "Cyncle" jak sie glośno żegno i godo: "Wszelki duchu, czego chcesz od
nas.." Jo odpowiadom głosym jak yno moga najchrubszym : wyndzoooonnnkkkiiiii...!
„Cyncla" sie odezwała prziciszonym niby ze strachu głosym: " Zaroz ci dom, poczekej yno aże Aleks
trocha oder-znie..."
Za mało chwilka widza, ze rychtyk cosik w rynce dzierzy i z ciekawościom patrza do gory, aż mi sie gymba otwarła. Te
dwie kole mie tak samo patrzom, co to teraz bydzie. Łoroz coś gichhhh...... z wiyrchu na nas.
Jo yno w gymbie poczuł coś słonego i śmierdzącego, a te dwie moje "Śmiertki" cołkie czymś gyńściejszym
postrojone.
Tego do dzisioj niy zapomna, jak my pociepli gibko ta bania i sorkali drabko ku hanysowyj łące, kaj w przikopce my sie
myli z tyj "wyndzonki", a i tak my smierdzieli jak Dudki.
Zmarznyci, bo było to tyż o takim czasie, przed Wszystkimi Swiyntymi, prziszli my potym dudom. Nachytoł żech wtedy od
taty pociynglym, żech cołko rzić mioł sino.
Od tego czasu my z daleka mijali łokno od "Cyncle", ale z baniami to my dalij straszyli małe dzieci.
Z tego wyniko, że tyn „Hallowe’en” my już znali pryndzyj od amerykonów.
Utopek (-)
Witejcie w krainie Utopków !
www.utopek.itatis.pl
www.Slonzoki.de
B a n i a